ប្រែសម្រួល ៖ លន ស្រស់

ទីភ្នាក់ងារសហប្រតិបត្តិការអន្តរជាតិជប៉ុន (JICA) បានប្រកាសកាលពីថ្ងៃអង្គារ អំពីការចូលរួមវិភាគទានចំនួន ១ ពាន់លានដុល្លារទៅក្នុងមូលនិធិមួយ ដែលមានគោលដៅជំរុញផ្នែកវិស័យឯកជននៃធនាគារអភិវឌ្ឍន៍អន្តរអាមេរិក ដើម្បីផ្តល់ហិរញ្ញប្បទានដល់កំណើនប្រកបដោយចីរភាពនៅទូទាំងតំបន់អាមេរិកឡាទីន និងការ៉ាប៊ីន។

ជំហាននេះគឺជាមូលនិធិវិស័យឯកជនដ៏ធំបំផុតរបស់ JICA នៅក្នុងតំបន់ និងជាលើកដំបូងជាមួយ IDB Invest ដែលបានផ្តល់អាទិភាពដល់ការប្រើប្រាស់ហិរញ្ញប្បទានតាមរយៈយុទ្ធសាស្ត្រ “បង្កើតដើម្បីចែករំលែក”។

គំរូនេះស្វែងរក និងចាប់ផ្តើមឱកាសវិនិយោគនៅក្នុងតំបន់ ដោយធ្វើសមាហរណកម្មផ្នែកនៃការវិនិយោគទាំងនេះទៅឱ្យវិនិយោគិន ជំនួសឱ្យការរក្សាទុករហូតដល់ពេលផុតកំណត់។

គោលដៅគឺដើម្បីបញ្ចេញមូលធនសម្រាប់ការវិនិយោគឡើងវិញយ៉ាងរហ័សក្នុងគម្រោងថ្មីៗ និងដើម្បីពង្រីកផលប៉ះពាល់ ខណៈពេលដែលតំបន់អាមេរិកឡាទីន និងការ៉ាប៊ីនប្រឈមនឹងគម្លាតហិរញ្ញប្បទានប្រកបដោយចីរភាពប្រចាំឆ្នាំប្រមាណ ៩៩ ពាន់លានដុល្លារ យោងតាមការប៉ាន់ប្រមាណរបស់អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD)។

នៅក្នុងសេចក្តីថ្លែងការណ៍រួមមួយ ជេអាយស៊ីអេ និងធនាគារអភិវឌ្ឍន៍អន្តរអាមេរិកបានឱ្យដឹងថា អាស្រ័យលើការព្រមព្រៀងទ្វេភាគី មូលនិធិថ្មីនេះមានសក្តានុពលក្នុងការពង្រីកដល់ ១,៥ ពាន់លានដុល្លារ បន្ទាប់ពីរយៈពេលបីឆ្នាំ។

លោក អ៊ីឡាន់ ហ្គោល់ដហ្វាជិន ប្រធានធនាគារអភិវឌ្ឍន៍អន្តរអាមេរិកបានមានប្រសាសន៍ថា “គំនិតផ្តួចផ្តើមនេះនឹងមិនត្រឹមតែជំរុញការវិនិយោគឯកជនប៉ុណ្ណោះទេ ប៉ុន្តែថែមទាំងលើកកម្ពស់ការអភិវឌ្ឍប្រកបដោយចីរភាព នវានុវត្តន៍ និងកំណើនសេដ្ឋកិច្ចនៅក្នុងតំបន់ផងដែរ”៕

ប្រភព៖ រ៉យទ័រ